මේ හොරාට නමක් දෙන්න?

2012 බට්ටි ලියන පළවෙනි පෝස්ටුව. අත්කමකින් වැඩේ පටන් ගන්න තමයී බට්ටා හිතාගෙන හිටියේ. ඒක කර ගන්න බැරුව ගියා වැඩ රාජකාරී අස්සේ. මම මේ කියන්න හදන්නේ මට ඊයේ අහන්න ලැබුණ දෙයක් ගැන.

මම දකින විදියට ‍ලොක්කේ තියෙන අමාරුම ජොබ් එක පව්ම ජොබ් එක තමයී කුණු එකතු කරන එක. ඇත්තමයී අපි කාපු බත් එකක ඉතුරු වෙච්ච කොලේ බල්ලෝ ඇදලා දාලා තියෙනවා දැක්කොත් කොයි තරන් නම් පිළිකුල් කරනවද? ඔන්න දැන් කට්ටිය කියන්න එපා අනේ අපිට නම් එහෙම නෑ කියලා. මට නම් වැඩ කරන තැනට එද්දී කලින් දවසේ කුණු එක ගෙනියන්නේ නැතුව තිබිලා බල්ලෝ ඇදලා තිබුනොත් සසර එපා  වෙනවා.

කුණු එකතු කරන අය කොච්චරට ලොකු කැප කිරීමක් ද කරන්නේ? එයාලා අපි අප්පිරිය කරන කුණු එකතු කර ගෙන යනවා. ඒ අය මේ ජොබ් එක කරන්නේ වෙන කරන්න ජොබ් එකක් නැති නිසාද? මගේ අක්ක නම් කියන්නේ එයාලා පතා ගෙන ආපු විදියලූ. ගිය ආත්මේ කරපු අකුසල් නිසාලූ ඒ වගේ ‍රස්සවක් කරන්න වෙන්නේ.

අපේ ගම් වල නම් මේ විදියට ගෙවල් වලට කුණු ගෙනියන අය එන්නේ නෑ. ගෙදරම ගිනිදීසිය කෝටු ගහලා වට කරපු එකක් ඇතුලට කුණු ටික දාලා කොම්පෝස්ට් කර ගන්නවා. තියෙන පොලිතින් වලක් කපලා වළදානවා. ඒත් ඉතිං කොළඹ කොහේද එව්වට ඉඩකඩ. මෙහේ සතියක් කුණු ගෙනියන්නේ නැතුව තිබුණොත් පාරක අඩියක් තියන්න බැරි වෙයී.

කුණු එකතු කරන්න එන අය හැම අවුරුද්දකම එනවා උදව්වක් ඉල්ල ගෙන. ඒ කියන්නේ ඉතිං සල්ලි කීයක් හරි තමයී ඒ අය බලාපොරොත්තු වෙන්නේ. ඉතිං මේ අවුරුද්දෙත් 30 වෙනිදා ආවා එහෙම කෙනෙක්. කුණු එකතු කර අයට උදව්වක් කිව්වා.මම ඉතිං දෙපාරක් හිතුවේ නෑ. දුන්නා සල්ලී. කොහොමත් ඉතිං අපි හැම පාරම දෙන දෙයක්නේ. ඕකට අමුතුවෙන් හිත හිත ඉන්න දෙයක් නෑ නේ. ඒ මිනිස්සු කරන කැප වීමට එහෙම උදව්වක් කරන එකත් ලොකු පිනක්නේ.

මෙන්න අලුත් අවුරුද්දේ 2 වෙනිදත් එනවා උදව්වක් ඉල්ල ගෙන. වෙන්න බැරි දෙයක්නේ අනේ. ඇයි මේ දෙපාරක් එකම අවුරුද්දට සල්ලි එකතු කරන්නේ. මම ඉතිං කිව්වා අපි දුන්නනේ කියලා. ඒ අපු මනුස්සයෙක් ඇහුවා කාටද කියලා. මම කිව්වා මං දන්නෑ කුණු එකතු කරන අයට උදව්වක් කරන්න කියලා එක්කෙනෙක් ඇවිත්  කිව්වා එයාට දුන්නා කියලා. අනේ ඊට පස්සේ අර මනුස්සයා හරි අසරණ විදියට කියනවා බලන්න නෝනා මේ පැත්තෙම සල්ලි කව්ද මනුස්සයෙක් කලින් ඇවිත් අරන් ගිහින්. අපි තමයී මේ පැත්තේ කුණු හැමදාම එකතු කරන් යන්නේ කියලා. ඒ මනුස්සයා හරි අසරණ විදියට දොර ඇරගෙන එළියට ගියා. අපි කලින් කෙනෙක්ට සල්ලි දුන්නත් මේ මනුසසයා ඒකට මොනා කරන්න ද කියලා මට දුක හිතුනා. මම  වැඩ කරන කෙනෙක් අතේ ඒ අයට සතුටින් මුදලක් යැව්වා.

එතකොට 30 වෙනිදා සල්ලි ගෙනියන්න ආවේ කව්ද? මේක ලොකු ප්‍රශ්නයක්. අහිංසක දුප්පත් මිනිස්සුන්ට මේ වගේ පහත් අමන වැඩක් කරන්න තරම් පහත් වෙච්ච මිනිස්සුද අපේ රටේ ඉන්නේ. පාට පාට ලෝක වලට යන කෙනෙක්ද එදා ඇවිත් සල්ලී ගෙනිච්චේ. ඒ වගේ වැඩක් කරපූ කෙනෙක්ට ලබන්න තව ආත්මයක් ඉතුරු වෙයිද?